Diploma Ludovici, regis Francorum, quo notum facit se, rogatu Cluniacensis abbatis, prioratum de Amberta sub potestate sua ponere.
In nomine sanctæ et individuæ Trinitatis. Amen. Ego Ludovicus, rex Francorum, omnibus in perpetuum. Regiæ magnificenciæ opus esse dignoscitur, non solum ecclesias regni beneficiis ampliare, verum etiam brachio defensionis amplecti, et ne a dignitate coronæ in manus alienas processu temporis deveniant præcavere. Notum itaque facimus universis, tam futuris quam præsentibus, quod rogatu amici
et fidelis nostri, venerabilis viri Stephani, Cluniacensis abbatis, et totius ecclesiæ, quæ magnum hujus regni membrum existit et cujus religio diebus nostris insigne sanctitatis præbet exemplum, crebra etiam petitione dilecti ac familiaris nostri Artaldi, prioris de Amberta, eandem ecclesiam, videlicet Ambertam, cum omnibus appendiciis suis in manu et protectione nostra suscipimus; decernentes ut [eadem] ecclesia et possessiones suæ universæ in perpetuum sub regio permaneant dominio et protectione, auctoritate etiam regia prohibentes ne alicui heredum nostrorum, aut alii unquam homini liceat eam aliquo modo ad aliam transferre potestatem. Quod ut ratum in posterum et immobili firmitate subnixum permaneat, scripto notari, et sigilli nostri auctoritate confirmari præcepimus. Actum publice, apud Fontem Bliaudi, anno Verbi incarnati M. C. LXIX, regni vero nostri XXXIII, a Philippi filii nostri nativitate quinto. Subter etiam inscripto nominis nostri karactere, astantibus in palatio nostro, quorum apposita sunt nomina et signa. Signum comitis Theobaldi, dapiferi nostri. S. Guidonis buticularii. S. Mathæi camerarii. S. Radulfi constabularii. Data per manum Hugonis cancellarii et episcopi Suessionensis.